آب 21 2016

قصيدة مرة مرة عشرتي وياك مرة - كاظم اسماعيل الگاطع

مرة مرة عشرتي وياك مرة
كاظم اسماعيل الگاطع

#قصيدة مرة مرة - الشاعر المرحوم كاظم اسماعيل الگاطع

مرة مرة
عشرتك وياك مرة
ومن اريد انساك يمنعني الگلب
ويذب له حسرة
ومن اريد انساك يعرض لي الدرب
ويگللي الك خطوات ذكرى
ومن اريد انساك تذكرني الملامة
وشنهو ربحي وياك واللي مادروا
گالوا تخسره
وآنا شنهي الما خسرته حتى اخسره
ويا نهر يعتب عليه
وانا بجناحي الگصب روجاته عبرة
ويا جبل يصعب عليك
حتى اذب حبال روحي
گصايب اعله چتاف صخرة
ويا عظم تتصوره التم
حتى يم بابك عشر كسرات اكسره
مرة مرة
والمرارة تزيد لليمشي بجزيرة
وما لگه وسادة محبة تريح ظهره
والمرارة تزيد للما يلگه في
وينتچي اعله الشيب عمره
ويا جمرتي الما طفت والمي تچوه
حسبت يطفيها دمعي
ثاري دمعاتي اعله خدي نار كبرى
اشبيدي يا من مدري شنهي
كون اضل لوحدي وگلبي يتبره
يمكن الگه بهندسك راس الشليله
ويمكن اصفن صفنه زينه والگه فكرة
انت من دگيت بابي جبت وياك الحزن خطار ماين
والفرح طلعته بره
وآنا من شگيت زيجي احترگت ايدي
وانت من شگيت زيجك شفنه گمره
وچان عمري نهر غافي
ومايه صافي
وخنجرك مثل البلم بالليل طره
ويا نهر والحسرة حسرة
بگلبي حسرة كون اشوفن سندبادك
شايل اعله چتافه جزره
بگلبي حسرة كون اذب ثوب الحزن وآنا بشبابي
والحزن ع الخد اسطره
هي حسرة وأمنية نسميها فكرة
كون اشوفن مريمك مابيها لوله
ومن صدگ نلگاها عذرى
هي حسرة.. وعشرة مرة
والمرارة تزيد للما يلگه في
وينتچي اعله الشيب عمره


حسابي على التليجرام
alfajrawy@
إضافة قصيدة