اعيش المن

كُـبـر جــرح الـيـحبك مـا بـعد يــنـشـد
أعـيـش شـلون؟ إذا كـل الـصبر يـنفد
أعـيـش المن؟ اذا باب الوصال انـسد
صحـت ويـنك ردت بـعيـونك اتـعـبّـد

صحت وينك انه بحاجه لنظر وجـهك
أدور بالـبـشـر مـــا واحـــد يــشـبـهـك

سـنـيـنـي بـفـرگـتـك لا مـو عُـمر تـنعد
صـلـب عــــودي لان بــسـدك اتــلــبـد
وأحــس هـسا أريـد الـگومتـي مسند
أريـد أحـچـيـلك ومـن كـلـشي أتـجرد

وأخـبـرنـك تـغـير كـلـشـي مـن بعدك
بـشـرنه مـو نـفـسـهـا الچانت بعهدك

تـغير كلشي حتى جروحي ما تضمد
خِــرس حـتـى الـلـسـان الـگـبـل غرد
وأخـبـرنـك غـــيـابـك للـحـزن جـسّـد
صـرت بـعـدك ذلـيل ومـا الــي أحــد

أحس وحدي أحس كل البشر ضدي
صـبـر شـهدي أريدك تـوگـف بسـدي

نظر عيني لمثل شخصك أبد ما صـد
عـيـون الـفـگدتك من حگـها لو ترمد
أريـد انـفـاسـك اشـتـمـهـا مـن اتنهد
واذا مو عطرك اشتمه النفس يخمد

عـفت بعدك گلب ما بـي نبض لا دم
رحـت عـني وعفتـني شـلون أتأقلم

أشـوف بغـيبـتك لون الـفرح أسـود
على احـوالي اذا تـسألني هاك الرد
تحت جـفـني الـحزن بعـيوني يتأبد
جـمر بُـعدك أريــد بـشـوفـتك يـبرد

جـروحي بـشـوفـتـك تـتلايم وتبره
اعـذره الـي يعاتـب لو خلص صبره

أمس چنت بدلالك ما يحدني الحد
صـرت بـعـدك يـتيم وضـايع مـشرد
گـبل مـا چـانت دمـوعي تزور الخد
صـبح خــد الـتـبـوسه للـدمـع معبد

نـظر عـيـني حلم من صورتك شيد
وأحـافـظ عالحلم واتـمـنـه يتجدد