حبيبتي

هو العنده مثلك يهم بعد لليل
من تهل كمر وجنك شمس من تبعد
عمي انته مو تنباس لا تنشم
من رجلك لراسك اشمك مستعد
وادعي من الله واصيحن يارجواي
ياربي خلي ايامي كلهه برد
خاطر دفو احضانه يطفي النيران
نيران كلبي ابد ماتنخمد
محبوبي بسم الله ماشاء الله
ينكط عسل وحيل اترف من الورد
امشي بطريق واعرفه مر منا
تشتم عطر رزحه الناس من عن بعد
ياورد جوري ياسيسبان وقداح
دلالي هايم بيك ومني شرد
دور ابيتك تلكه دلالي هناك
ساكن ابيتك وراح يضل للابد
كلك ابد لاتطلع بوجه الناس
ياعمري اخاف عليك من الحسد
شايل عيون وساع جنهن وطن
ومن اجل الوطن انطي العمر مستعد
ياطولك الهيبه وخصرك جن سيف
لو شايفك ابليس جا لله سجد
شعرك على متونك لو هذا الشال
ياعسل الله واحلى من الشهد