#رأس_السنة
راس السنـة بس فـاطمه براسي
كل عـام وآنـه حـسيـن أنـفــاسي
والمهدي موعد عاش بإحساسي
* * *
يـجـي عـام بـدنـيـتي ويـروح عـام
والبدايه فاطمه ومـسـك الخـتـام
حسين اذا ماكو على الدنيا السلام
هوّه عشگي وكل مواعـيـد الغـرام

تخلص سنه وثاني سنه تبدي
وسالفتي ثار حسين والمهدي
بيها حـديـثي وي هلي ونـاسي
* * *
الدنيا كلها ماتهمـني مـن الأساس
واحتفالي بمجلسي وهوّه القياس
من يجي راس السنـه اذكـر ينـاس
حسيـن طايـح عالثـره وبلايه راس

عامي الجديد وباقي اعوامي
كلهن وقف للمنـذبح ظـامي
وأهل العزه يصيرون جلّاسي
* * *
يل گلت كل عـام وانت بالـف خير
اشكرك بس خلّي اگلّك شنو الخير
عام مابي خدمه ما ينحـسـب خير
حسين وأمّه فاطمه مصدر الخـير

دنيا وعرفنه الموت تاليها
بلا فاطمه كل خير مابـيها
وبهاي اذكرك لو چنت ناسي
* * *
گالوا افرح من أجل عيسى المسيح
گلت عيسى مگابل حسين ويصيح
بالكـنـيـسـه مريـم تگـوم وتـطـيـح
تگـول أواسـي فاطـمـه أم الذبـيـح

وسط الكنيسه گاعـده مريـم
لكسر الضلع تنحـب وتـتـألّم
وعيسى يگول حسين قدّاسي
* * *
آنـه رايـد ابـتـدي عـامي الجـديـد
بمجلس الزهراء وحسين الشهيد
اعـتـراض اليعـتـرض لا مـايـفـيــد
العن الكاسـر ضلـع والعـن يـزيـد

گالوا عليك اصوات معترضه
گلت المهم أم الحسن ترضه
وما اخلّي ربع ابليس مقياسي
* * *
عاليعـادون الشـعـائـر صوتي صاح
القافله تمـشـي ولا ايمهـما النُـبـاح
كل شخص حارب عزيز الزهره طاح
عالرمح راسه سحگ روس الرماح

يل حاربتني انتبه واصحه
ليرفعه الله محّد ايطيحه
وشلون اطيح حسين آساسي
* * *
اندب المهدي ودمع تارس العين
راح عـام واجـه عـام وانـتـه ويـن ؟
برگبتك يبـن الأمـاجـد باقي ديـن
ثـار أمّـك فاطمه وثـار الحسـيـن

گلبك اكيد من الهضم شيّب
سلبـوا خدرهـا عمّـتك زينب
صاحت سبوني خلاف عبّاسي
* * *
المهدي غايب يعني ماعندي سرور
الدنيا ملـيـانه ظلـم ماليانـه جـور
يـمـتـه يـرفـع رايـة الحـگ ويـثـور
دعـوتي اللـهـمَّ عـجّـل بالظـهـور

بحر الفتـن تتـلاطـم أمـواجـه
ومركب أمان المهدي نحتاجه
أحنـه حـيـاره والـزمـن قـاسي
* * *
اللهمَّ لا تحرمنا من نعمة خدمة مُحَمّد وآل محمد الطيبين الطاهرين
#وسام_الشويلي