ومضات للشاعرعمرالحربي

چنت آنه اويه غيرك كلي اجروح
أجيتك راد گلبي يطيب يمك
شو زودت فوگ جروحي جروح
وصرت انته المصيبة الماتفض منك
_________
سألوني وتهت من رادوا يسألون
ياهو الخان عهدك والوعد عفته؟
جاوبت بصراحة وچنت افكر بيك
نسيت جروحي كلها وصحت انته!
_______
تچيت ظهري الك حسبالي حيط اصير
وما حسبت تغدر تنكر العشرة
​ردت منك وفه يبرد لهيب الروح
شفت غدرك جمر زاد الجرح جمرة
_______
تِعَب جفني بسهرهم ما غفت عين
وسِهم غدر الوجع بالگلب شاع
بعد ما ظل صَبِر والحيَل مهدوم
سفينة بلا حبيب وتيهت شراع
______
رخصت كلمة أحبك والعهود
وصرت تمشي ويا الأبد ما شاكلك
روح لليختار وجهك مو گفاك
وعيش وياه البالچذب يستاهلك

_________
أعتب عالزمان الما صِفَى وياي
وعلى وادم نستني وجرحت إحساس
زرعت الوفه بدربك يالمحب ليش؟
مع كل الاسف زرعي شلون ينداس
________

چنت لو تبرد أضمّك بالضلوع
وهسة نار جفاك حرگتني ولك
لا تجيني تگول نادم ع المِضى
المات بالـ دلال ما يرجع الك

______
أكلك شغلة وأقفل باب العتاب
بعد ما ظل دمع بالعين وأبچيلك
سبيت الروح،
هدمت الحيل،
عفتني رماد
اشتعلوا أهلك بعد شتريدني حچيلك؟