اعلنها للناس اليوم حبيتك
يبعيون بجمالك حايرة الطلاب

وانه اول شخص بالكون حبيتك

تتباهه بجمالك جامعه بغداد

وتاخذك تحية اقسام كليتك

من تحجي بعيونك انه ارد بالعين

هاي اول اشارة وبيها دليتك

مرات ارد اعوفك لكن من تروح

اظل واكف بدرب الرجعة تانيتك

صح انت حلو ومتكبر ومغرور

لا تثكل علي كافي انهجم بيتك

مو ذاب الكلب ووصلت حد الموت

وانه اهلي وعمامي بكتلي باليتك

يالشالك ثولني ولعب بية لعوب

خبلني بألوانه وحرت من جيتك

كلها مكبله ومرتاحة هالطلاب

وانه بلا كبل وانتظر برقيتك

من يوم العرفتك اعلنت اضراب

ازعل الدنيا كلها وانت راضيتك

يا دكتور كلبي ويا عميد الروح

انت استاذ عيني وصدري كليتك

اغار من الوكف وياك لو لحظات

ومن كد ما اغار اعذرني سبيتك

يالمنور العمادة وسنتر العشاك

ارجف وارتبك لو مرة لاكيتك

اكوم اقره شعر وبين هالطلاب

ريتك تفتهم يا منيتي ريتك

اجيتك ارد اصارح واكشف المستور

اريد اعرف يغالي شنهي تاليتك

يبو عيون الشعر ما وصفك جذاب

حليو انت وكمر االتربيه سميتك

احبك هذا طبعي وما اظم عليك

واعلنها للناس اليوم حبيتك